Poist bhuana nach bhfuil oscailte ach do na daoine seo a leanas:

● Oifigigh Oifig an Ombudsman Eorpaigh i gcomhréir le hAirteagal 29(1)(a) de na Rialacháin Foirne;

● Oifigigh institiúidí uile an Aontais Eorpaigh i gcomhréir le hAirteagal 29(1)(b) de na Rialacháin Foirne;

● Iarrthóirí a chuireann an Oifig Eorpach um Roghnú Foirne (EPSO) ar phainéil.

An tOmbudsman Eorpach

Féachann an tOmbudsman Eorpach le torthaí cothroma a bhaint amach maidir le gearáin i gcoinne institiúidí an Aontais Eorpaigh, spreagann sé trédhearcacht, agus cuireann sé cultúr riaracháin seirbhíse chun cinn. Tá sé mar aidhm aici muinín a chothú trí idirphlé idir saoránaigh agus an tAontas Eorpach agus na caighdeáin iompair is airde a chothú in institiúidí an Aontais.

Ár dtreoirphrionsabail: Ionracas, Cothromaíocht, Cuntasacht, Idirphlé agus Seirbhís.

Is fostóir comhdheiseanna é an tOmbudsman Eorpach a spreagann iarratais ó fhir agus ó mhná cáilithe agus nach ndéanann idirdhealú ar bhonn, i measc nithe eile, aoise, míchumais, cine, reiligiúin nó gnéaschlaonta.

Catagóir agus grád

Oifigigh dlí de ghrád AD 5 go grád AD 6.

Na hiarrthóirí ar éirigh leo i gcomórtais EPSO, earcófar iad ag an ngrád dá bhforáiltear sa liosta ionadaithe ar ar cuireadh iad.

Áit fostaíochta

Strasbourg nó an Bhruiséil.

Féadfaidh misin chuig áiteanna oibre eile de chuid na n-institiúidí a bheith i gceist leis na poist sin. Féadfaidh misin chuig tíortha eile laistigh nó lasmuigh den Aontas Eorpach a bheith i gceist leo freisin.

Cineál na gcúraimí

● Anailís a dhéanamh ar ghearáin a chuirtear faoi bhráid an Ombudsman Eorpaigh agus fiosrúcháin arna ndéanamh ag an Ombudsman a láimhseáil;

● Fiosrúcháin a dhéantar ar thionscnamh an Ombudsman Eorpaigh féin a mholadh agus déileáil leo;

● Nótaí agus cinntí a dhréachtú agus a mholadh maidir le síniú an Ombudsman Eorpaigh, chomh maith le doiciméid oifigiúla eile a bhaineann lena fiosrúcháin agus lena comhfhreagras le saoránaigh;

● Faisnéis a dhréachtú don phobal ar bhealach inrochtana agus sothuigthe;

● Rannchuidiú le cultúr seirbhíse a iomadú i státseirbhís an Aontais;

● Rannchuidiú le dréachtú thuarascáil bhliantúil an Ombudsman Eorpaigh;

● Cabhrú leis an Ombudsman Eorpach a gníomhaíochtaí seachtracha a ullmhú, ionadaíocht a dhéanamh don institiúid ag imeachtaí poiblí áirithe, téacsanna a aistriú agus aistriúcháin a sheiceáil.

Na cáilíochtaí agus an t-eolas is gá

● Leibhéal oideachais is comhionann le cúrsa iomlán ollscoile a mhair trí bliana ar a laghad agus ar baineadh dioplóma amach dá bharr;

● ● Dioplóma sa réimse dlíthiúil [1];

● Eolas críochnúil ar institiúidí, riarachán agus dlí an Aontais;

● Eolas críochnúil ar cheann amháin de theangacha oifigiúla an Aontais Eorpaigh agus eolas sásúil ar cheann eile de na teangacha sin;

● Eolas an-mhaith ar an mBéarla (ó bhéal agus i scríbhinn araon);

● Bheadh eolas ar theanga oifigiúil bhreise nó ar theangacha oifigiúla breise an Aontais Eorpaigh ina bhuntáiste.

Taithí oibre

Níl aon taithí ghairmiúil shonrach ag teastáil. Bheadh taithí ar dhéileáil le gearáin nó le hachainíocha ina buntáiste, áfach. Bheadh taithí ar dhréachtú (sa réimse dlíthiúil nó i réimsí eile) ina buntáiste freisin.

Na scileanna agus na cáilíochtaí is gá

● Sárscileanna dréachtaithe, lena n-áirítear an cumas scríobh go soiléir;

● An cumas:

o na fíricí criticiúla i saincheisteanna casta a shainaithint agus réitigh chruthaitheacha agus phraiticiúla a fhorbairt;

cumarsáid shoiléir bheacht a dhéanamh ó bhéal agus i scríbhinn araon;

freagracht phearsanta agus tionscnaíocht a ghlacadh as obair ar ardchaighdeán a chur i gcrích laistigh de nósanna imeachta socraithe;

scileanna pearsanta agus eolas ar an eagraíocht agus ar a timpeallacht a fhorbairt agus a fheabhsú;

o tosaíocht a thabhairt do na cúraimí is tábhachtaí, oibriú go solúbtha agus a ualach oibre féin a eagrú go héifeachtúil;

oibriú i gcomhar le daoine eile i bhfoirne agus thar theorainneacha eagraíochtúla agus difríochtaí idir daoine a urramú;

obair a dhéanamh i dtimpeallacht ilchultúrtha;

o leanúint de bheith éifeachtach faoi ualach trom oibre, frustrachas eagraíochtúil a láimhseáil go dearfach agus oiriúnú do thimpeallacht oibre atá ag athrú;

● Tiomantas do chultúr seirbhíse.

Iarratais

Ní mór d'iarratais ^[2] tagairt a dhéanamh don fhógra folúntais: OMB/04/2015 - Oifigigh Dlí AD 5/AD 6 agus ní mór iad a sheoladh tríd an bpost cláraithe chuig an seoladh thíosluaite. Is é an 21 Bealtaine 2015 ar a dhéanaí an dáta a phostófar an t-iarratas. Measfar iarratais a chuirfear suas tar éis an 21 Bealtaine 2015 a bheith neamh-inghlactha.

Oifig an Ombudsman Eorpaigh
Pearsanra, Riarachán, agus Aonad Buiséid Fógra folúntais OMB/04/2015- Oifigigh Dlí AD 5/AD 6
1, avenue du Président Robert Schuman
CS 30403
67001 Strasbourg Cedex
France

Ní mór na nithe seo a leanas a bheith san áireamh sna hiarratais:

a) Foirm iarratais atá comhlánaithe go cuí agus atá le fáil ar shuíomh gréasáin an Ombudsman Eorpaigh ag an seoladh seo a leanas: http://ombudsman.europa.eu/vacancy;

litir ina mínítear na cúiseanna atá ag an iarrthóir le hiarratas a dhéanamh;

cóip de curriculum vitae an iarrthóra (CV Europass más féidir: http://europass.cedefop.europa.eu);

d) Maidir le hoifigigh institiúidí an Aontais Eorpaigh, cóip de na trí thuarascáil foirne is déanaí ón iarratasóir [3].

Eisiafar iarratais neamhiomlána ón roghnú.

Iarrtar ar iarrthóirí seoladh ríomhphoist bailí a chur ar fáil a bheidh le húsáid le haghaidh teachtaireachtaí ó Oifig an Ombudsman maidir leis an nós imeachta seo.

Strasbourg, 29/04/2015

Emily O'Reilly

[1] Is féidir leis an dioplóma seo a bheith comhionann leis an dioplóma thuasluaite lena bhfianaítear staidéar ollscoile críochnaithe trí bliana ar a laghad.

[2] Rialaítear próiseáil sonraí pearsanta ag an Ombudsman Eorpach le Rialachán (CE) Uimh. 45/2001 ó Pharlaimint na hEorpa agus ón gComhairle an 18 Nollaig 2000 maidir le daoine aonair a chosaint i ndáil le sonraí pearsanta a phróiseáil ag institiúidí agus comhlachtaí an Chomhphobail agus maidir le saorghluaiseacht sonraí den sórt sin, IO 2001 L 8, lch. 1. Trí iarratas ar phost a chur isteach laistigh d'Oifig an Ombudsman Eorpaigh, tuigtear gur thoiligh iarrthóirí, de réir bhrí Airteagal 5(d) den Rialachán, le próiseáil na sonraí pearsanta atá san iarratas agus sna doiciméid tacaíochta atá i gceangal leis. Is í Oifig an Ombudsman Eorpaigh a bhailíonn na sonraí pearsanta atá i gceist chun críche an nós imeachta roghnúcháin seo agus chun na críche sin amháin. Tá sé de cheart ag iarrthóirí a sonraí pearsanta féin atá á gcoimeád ag Oifig an Ombudsman Eorpaigh a rochtain agus a cheartú.

Scriosfar sonraí pearsanta a bhaineann le hiarrthóirí nár éirigh leo dhá bhliain tar éis don liosta ionadaithe dul in éag. Iarratais a chuirfear isteach chun críocha an nós imeachta roghnúcháin seo, ní chuirfear san áireamh iad chun críocha na n-iarratas a dhéanfar amach anseo.

Coinneoidh Oifig an Ombudsman Eorpaigh sonraí pearsanta a bhaineann leis na hiarrthóirí a earcófar agus d'fhéadfaí iad a aistriú chuig Institiúidí Comhphobail eile chun críocha riaracháin.

Féadfaidh iarrthóirí, tráth ar bith, dul i gcomhairle le hOifigeach Cosanta Sonraí an Ombudsman Eorpaigh nó dul ar iontaoibh an Mhaoirseora Eorpaigh ar Chosaint Sonraí.

[3] Má tá níos lú ná trí thuarascáil foirne tarraingthe suas d’iarrthóir go dtí seo, ní mór don iarrthóir sin na tuarascálacha foirne sin a tarraingíodh suas a sheoladh.