Strasbourg, 21/09/2017

Cinneadh ón Ombudsman Eorpach i bhfiosrúchán 454/2014/PMC maidir le cleachtas na Seirbhíse Eorpaí Gníomhaíochta Seachtraí tréimhsí oiliúna neamhíoctha a thairiscint i dToscaireachtaí AE

A Chathaoirligh, a chara,

I gcomhthéacs an fhiosrúcháin thuasluaite, a lean gearán le m’Oifig, bhí orm a mheas an iomchuí nach n-íocfadh an tSeirbhís Eorpach Gníomhaíochta Seachtraí (SEGS) a cuid oiliúnaithe i dToscaireachtaí an Aontais i dtríú tíortha.

Ag deireadh an fhiosrúcháin, chinn mé gurb ionann cleachtas SEGS gan oiliúnaithe a íoc ina Thoscaireachtaí agus drochriarachán. Dá bhrí sin, mhol mé do SEGS liúntas iomchuí a íoc lena oiliúnaithe uile, lena n-áirítear iad siúd i dToscaireachtaí an Aontais. Thagair mé ina leith sin don sampla dearfach ó Pharlaimint na hEorpa a chuir deireadh le tréimhsí oiliúna gan íocaíocht ina Rúnaíocht.

Mar fhreagra ar mo mholadh, chuir an tArdionadaí/Leas-Uachtarán Mogherini in iúl dom gur iarr sí cistí ó na húdaráis bhuiséadacha chun oiliúnaithe SEGS i dToscaireachtaí an Aontais a íoc.

Measaim gur gealltanas tromchúiseach í a freagairt chun oiliúnaithe i dToscaireachtaí an Aontais a íoc, faoi réir na hacmhainní buiséadacha iomchuí a bheith deonaithe di ag na húdaráis bhuiséadacha.

Táim cinnte go n-aontóidh tú go bhfuil sé tábhachtach oifigí ionadaíocha an Aontais ar fud an domhain a éascú chun a dtiomantas a léiriú maidir le tréimhsí oiliúna a chur ar fáil ar bhonn comhdheiseanna, gan beann ar chúlra ná ar acmhainní teaghlaigh.

Dá bhrí sin, iarraim go measúil ar na húdaráis bhuiséadacha an tsaincheist sin a scrúdú go cúramach agus buiséad an Aontais Eorpaigh á chomhaontú acu. Scríobh mé freisin chuig an gCoiste um an mBuiséad de chuid Chomhairle na nAirí agus chuig an gCoimisinéir Eorpach atá freagrach as an mBuiséad ina leith sin.

Gheobhaidh tú faoi iamh cóip de mo Chinneadh san fhiosrúchán seo mar eolas duit.

Le dea-mhéin,

Emily O'Reilly

An tOmbudsman Eorpach