Strasbourg,10.04.2014

Cinneadh ón Ombudsman Eorpach lena ndúntar fiosrúchán féintionscnaimh OI/2/2011/OV i gcoinne an Choimisiúin Eorpaigh

A Uachtaráin, a chara,

Gheobhaidh tú faoi iamh cóip de mo chinneadh thuas lena ndúntar fiosrúchán féintionscnaimh OI/2/2011/OV.

Ar bhonn m'fhiosrúcháin féin, chinn mé é a dhúnadh leis an ráiteas criticiúil seo a leanas:

Theip ar an gCoimisiún freagra leordhóthanach a thabhairt ar an dréachtmholadh agus go háirithe, theip air úsáid a bhaint as an deis chun páirt chuiditheach a ghlacadh i bplé substainteach maidir le conas feabhas a chur ar a chaidreamh le saoránaigh a dhéanann gearán faoi sháruithe.  Ina theannta sin, theip ar an gCoimisiún a mhíniú go diongbháilte cén fáth nárbh fhéidir Teachtaireacht 2012 a athbhreithniú agus cén fáth nárbh fhéidir í a fhoilsiú san Iris Oifigiúil. Is ionann sin agus cás drochriaracháin.

Mar is eol daoibh, tá díospóireacht phoiblí leanúnach ann, arb í Parlaimint na hEorpa an gníomhaí lárnach inti, maidir leis an bhféidearthacht dlí de chuid an Aontais maidir le nós imeachta riaracháin a dhréachtú. Dá bhrí sin, measaim go bhfuil sé úsáideach mo chinneadh a chur ar aghaidh chuig Uachtarán Pharlaimint na hEorpa freisin, ionas gur féidir leis an bParlaimint é a chur san áireamh agus í ag déileáil le Tuarascáil Bhliantúil an Choimisiúin maidir le Faireachán ar Chur i bhFeidhm dhlí AE agus i bpléití na Parlaiminte amach anseo ar dhlí AE maidir le nós imeachta riaracháin.

Bheinn buíoch dá bhféadfadh an Coimisiún mé a chur ar an eolas faoin 30 Meán Fómhair 2014 maidir le haon ghníomhaíocht atá déanta aige i ndáil le mo thorthaí. Cuirfidh mé na freagraí sin ar mo ráitis chriticiúla agus ar mo ráitis bhreise san áireamh agus mo mheasúnú bliantúil á dhéanamh agam ar an gcaoi ar fhreagair institiúidí agus comhlachtaí do mo chonclúidí.

Le dea-mhéin,

Emily O'Reilly

Imfhálú: (seolta trí ríomhphost)

• Cinneadh maidir le fiosrúchán féintionscnaimh OI/2/2011/OV