Strasbourg, 24.01.2014

Fiosrúchán féintionscnaimh OI/2/2011/OV

A Mháire, a chara,

Cuireadh tús leis an bhfiosrúchán féintionscnaimh thuasluaite in 2011 agus é mar aidhm leis an Coimisiún a spreagadh chun athbhreithniú a dhéanamh ar a Theachtaireacht an 20 Márta 2002 chuig Parlaimint na hEorpa agus chuig an Ombudsman Eorpach maidir le caidreamh leis an ngearánach i leith sáruithe ar dhlí an Chomhphobail ^[1] ("Teachtaireacht 2002").

An 28 Márta 2012, rinne an tOmbudsman dréachtmholadh ar an ábhar. Áiríodh ann tograí nithiúla le haghaidh téacs athbhreithnithe ina gcuirtear san áireamh, i measc nithe eile, EU Pilot, córas clárúcháin CHAP agus an taithí a bhailigh an Coimisiún agus an tOmbudsman le deich mbliana anuas. Cúig lá ina dhiaidh sin, an 2 Aibreán 2012, ghlac an Coimisiún Teachtaireacht athbhreithnithe ^[2] ("an Teachtaireacht athbhreithnithe"). Is léir ón amchlár nach raibh deis ag an gCoimisiún moltaí an Ombudsman a chur san áireamh agus an Teachtaireacht athbhreithnithe á glacadh aige.

Tá an Teachtaireacht athbhreithnithe ar fáil ar shuíomh gréasáin EUR-Lex. I bhfianaise a thábhachtaí agus a leasa ghinearálta ní hamháin do shaoránaigh ach do riaracháin náisiúnta agus réigiúnacha san Aontas freisin, táim den tuairim go mbeadh sé chun leasa an dea-riaracháin é a fhoilsiú san Iris Oifigiúil freisin, mar a tharla i gcás Theachtaireacht 2002. Thabharfadh foilsiú den sórt sin comhartha soiléir do shaoránaigh agus do na Ballstáit maidir leis an tábhacht a leagann an Coimisiún ar chur chun feidhme ceart dhlí an Aontais. Chuirfeadh sé i dtábhacht freisin an rannchuidiú ríthábhachtach a dhéanann rannpháirtíocht na saoránach leis an smacht reachta trí chuidiú leis an gCoimisiún a ról mar ‘Chaomhnóir na gConarthaí’ a chomhlíonadh go héifeachtach agus go héifeachtúil.

Tugaim faoi deara nach cosúil go bhfuil an Teachtaireacht athbhreithnithe ar fáil i gCróitis go fóill. Dá n-aistreofaí go dtí an teanga sin é, d’fhéadfaí deis a thabhairt é a fhoilsiú san Iris Oifigiúil. Thabharfadh foilsiú den sórt sin deis freisin chun easnamh an Ombudsman ó sheolaithe na Teachtaireachta athbhreithnithe a leigheas, rud a sheachnódh an tuiscint gur mian leis an gCoimisiún ról tábhachtach leigheas an Ombudsman a íosghrádú ar bhealach éigin maidir le gearáin um shárú a láimhseáil. Thairis sin, dá bhfoilseofaí san Iris Oifigiúil é, bheadh an Coimisiún in ann moltaí an Ombudsman a chur san áireamh, ar moltaí iad nach raibh deis aige a dhéanamh roimhe sin ar na cúiseanna thuasluaite. Go háirithe, ba dhíol sásaimh dom gur bhreithnigh an Coimisiún na pointí seo a leanas:

1) Le mír 1 de phointe 7 den Teachtaireacht athbhreithnithe, cuirtear de cheangal ar an gCoimisiún an gearánach a chur ar an eolas i scríbhinn nuair a chomhoibríonn sé leis an mBallstát lena mbaineann chun scrúdú a dhéanamh ar an ngearán faoi EU Pilot. Is dul chun cinn dearfach é seo, agus cuirim fáilte roimhe. Mar sin féin, deir leathanach gréasáin an Choimisiúin maidir le EU Pilot freisin go gcuirfidh an Coimisiún an gearánach ar an eolas faoina mheastóireacht ar fhreagairt an Bhallstáit. Mholfainn don Choimisiún an gealltanas soiléir beacht sin a chur san áireamh i bpointe 7 den Teachtaireacht.

2) Déileálann mír 2 de phointe 8 den Teachtaireacht athbhreithnithe leis an gcás ina sáraítear an ghnáth-theorainn ama de bhliain amháin. Luaitear ann ‘go gcuirfidh an Coimisiún an gearánach ar an eolas i scríbhinn arna iarraidh sin dó’. Tá brí agus cuspóir na forála seo doiléir. Tugtar le tuiscint cheana féin le Cód an Choimisiúin féin um Dhea-Iompar Riaracháin go bhfuil oibleagáid ann gearánaigh a iarrann faisnéis faoi staid an fhiosrúcháin maidir lena ngearán a fhreagairt agus a chur ar an eolas, ní hamháin tar éis bliain amháin, ach tráth ar bith. Is éard a d’fhéadfadh a bheith i gceist leis an gCoimisiún ná go nglacfadh sé an tionscnamh chun an gearánach a chur ar an eolas más rud é, ar chúis éigin, nach bhféadfadh sé a imscrúdú a thabhairt chun críche laistigh de bhliain amháin, agus go ndéanfadh sé amhlaidh i scríbhinn arna iarraidh sin dó. Cheadódh sé seo teagmháil teileafóin (a thabharfaí faoi deara sa chomhad), agus litir nó ríomhphost ina dhiaidh sin dá n-iarrfadh an gearánach amhlaidh. Dá bhrí sin, iarraim ar an gCoimisiún machnamh a dhéanamh ar phointe 8 den Teachtaireacht a leasú chun an bhrí atá beartaithe a shoiléiriú.

3) Luaitear an méid seo a leanas ar leathanach gréasáin an Choimisiúin maidir le EU Pilot: "Tá sprioc-am ginearálta 20 seachtain leagtha síos le haghaidh freagraí atá le cur ar fáil (10 seachtaine d'údaráis na mBallstát agus 10 seachtaine do sheirbhísí an Choimisiúin)." Molaim don Choimisiún na sprioc-amanna sin a lua sa Teachtaireacht freisin.

Mar fhocal scoir, ba mhaith liom béim a leagan ar rún cuiditheach na litreach seo, arb é is aidhm di deis a thabhairt duit aghaidh a thabhairt ar na pointí thuas sula ndéanfaidh mé cinneadh maidir leis an gcéad chéim eile san fhiosrúchán féintionscnaimh leanúnach.

Le dea-mhéin,

Emily O'Reilly

cc: Maroš Šefčovič, an Coimisinéir um Chaidreamh Idirinstitiúideach agus um Riarachán