# Obair leantach ar na moltaí san fhiosrúchán thuasluaite maidir leis an gcaoi a láimhseálann Parlaimint na hEorpa, Comhairle an Aontais Eorpaigh agus an Coimisiún Eorpach iarrataí ar rochtain phoiblí ar dhoiciméid reachtacha
- Údar: Ombudsman Eorpach
- Dáta: 2025-08-18T00:00+02:00[Europe/Paris]
- [URL](https://www.ombudsman.europa.eu/ga/doc/correspondence/ga/210056)
---
|--------------------------------------------|
| An tArdrúnaí Comhairle an Aontais Eorpaigh |

A Ard-Rúnaí, a chara,

Go raibh maith agat as do litir dar dáta an 2 Bealtaine 2025 inar cuireadh in iúl dom freagra na Comhairle ar mholtaí an Ombudsman sa chás thuas.

Is ábhar misnigh é a thabhairt faoi deara gur scaip an Chomhairle cinneadh an Ombudsman ar na toscaireachtaí uile agus ar ranna uile a hArdrúnaíochta mar aon le meabhrúchán ar na príomhcheanglais trédhearcachta i ndáil le doiciméid reachtacha. Is ábhar misnigh é freisin a thabhairt faoi deara go bhfuil 'Treoir Trédhearcachta' athbhreithnithe á hullmhú ag an gComhairle maidir le gach ábhar a bhaineann le rochtain ar dhoiciméid. Bheinn buíoch díot dá bhféadfá cóip den treoir seo a roinnt le m'Oifig, mar eolas, nuair a bheidh sí tugtha chun críche.

Thairis sin, is díol sásaimh dom tiomantas na Comhairle míniú níos iomláine a thabhairt do na hiarratasóirí ar an gcaoi a ndearna an Chomhairle anailís féachaint an ann d'aon leas sáraitheach poiblí i nochtadh na ndoiciméad reachtach a iarradh.

Tugaim faoi deara, agus is díol spéise ar leith dom, iarrachtaí na Comhairle feabhas a chur ar a trédhearcacht réamhghníomhach, go háirithe a cinneadh tuilleadh doiciméad reachtach a chur ar fáil go poiblí tráth a gcúrsaíocht, tagairtí do 'pháipéir oibre' ('doiciméid WK') a fhoilsiú chun rochtain phoiblí a éascú, agus rannpháirtíocht na Comhairle sa tionscadal maidir le 'Rianaire Dlí an Aontais'.

Ba mhaith liom a athdhearbhú gur aimsíodh leis an bhfiosrúchán seo, i gcásanna inar diúltaíodh rochtain phoiblí nó nár deonaíodh ach rochtain pháirteach, nár chuir an Chomhairle argóintí agus fianaise atá nithiúil go leor ar fáil lena dtugtar údar le neamhnochtadh doiciméad reachtach nó a gcodanna. Sa chomhthéacs sin, molaim don Chomhairle tuilleadh machnaimh a dhéanamh ar na cineálacha argóintí a chuireann sí chun cinn nuair a dhiúltaíonn sí rochtain phoiblí ar dhoiciméid reachtacha, agus cásdlí Chúirteanna an Aontais Eorpaigh á chur san áireamh.

Tabhair faoi deara le do thoil go bhfuil sé i gceist agam monatóireacht a dhéanamh ar an gcaoi a gcuireann an Chomhairle na moltaí a rinneadh i gcomhthéacs an fhiosrúcháin seo chun feidhme bunaithe ar aon ghearáin a dhéanfar amach anseo.

Go raibh maith agat arís as do chomhoibriú maith sa chás seo.

Le dea-mhéin,

Teresa Anjinho An tOmbudsman


Eorpach

Strasbourg, 18/08/2025