Strasbourg, 27/07/2020

OI/4/2020/TE

Ábhar: Trédhearcacht chinnteoireacht na Comhairle le linn ghéarchéim COVID-19

A Uasail Tranholm‐Mikkelsen, a chara,

Chuir mé fáilte le déanaí ^[1] roimh na céimeanna a ghlac an Chomhairle chun doiciméid reachtacha bhreise a fhoilsiú go réamhghníomhach. Ba cheart go bhfágfadh na feabhsuithe sin go mbeadh sé níos éasca don phobal a dtuairimí a chur in iúl i reachtóireacht an Aontais, ar ceart tábhachtach daonlathach é.

Tá cinneadh á dhéanamh ag an gComhairle, in éineacht le príomhinstitiúidí eile an Aontais, faoi láthair maidir le bearta a bhfuil an-tábhacht ag baint leo mar fhreagairt ar ghéarchéim COVID-19. Ionas go mbeidh an pobal in ann institiúidí an Aontais agus a rialtais náisiúnta a thabhairt chun cuntais, agus a bheith rannpháirteach a mhéid is féidir i bpróiseas daonlathach an Aontais, ní mór na cinntí sin a dhéanamh ar bhealach trédhearcach.

Chinn an Chomhairle maolú, ar bhonn sealadach, ar a Rialacha Nós Imeachta chun leanúint dá cuid oibre sna himthosca eisceachtúla sin. Tuigim gur scaip Ardrúnaíocht na Comhairle nóta inmheánach, ina leagtar amach go mionsonraithe an chaoi a bhfuil an Chomhairle ag feidhmiú faoi théarmaí an mhaolaithe seo.

Cé go n-aithním gur gá don Chomhairle a próiseas cinnteoireachta a oiriúnú sa staid reatha, ní mór na caighdeáin trédhearcachta is airde a choinneáil, ní in ainneoin na géarchéime, ach go díreach mar gheall ar an ngéarchéim agus na cinntí tábhachtacha atá á ndéanamh le linn na tréimhse seo.

Le réamh-mheasúnú ar mhodhanna oibre reatha na Comhairle, ardaítear roinnt ábhar imní maidir le trédhearcacht, a leagtar amach ar bhealach níos mionsonraithe sna ceisteanna thíos. Tabhair do d’aire gurb é an príomhábhar imní go ndealraíonn sé nach bhfuil cinnteoireacht chomh trédhearcach céanna mar thoradh ar na socruithe atá ann faoi láthair toisc go bhfuil níos lú doiciméadachta ar fáil ná mar atá faoi ghnáthchúinsí. Chun leanúint ar aghaidh le m'fhiosrúchán,[2] is gá do m'Oifig athbhreithniú a dhéanamh ar dhoiciméid áirithe agus bualadh le hionadaithe na Comhairle.

Bheinn buíoch, dá bhrí sin, dá bhféadfaí cruinniú a shocrú idir m’fhoireann fiosrúcháin agus foireann na Comhairle, chun tuiscint níos fearr a fháil ar na socruithe trédhearcachta atá i bhfeidhm le linn ghéarchéim COVID-19, go háirithe a mhéid a bhaineann leis an doiciméadacht atá ar fáil maidir le próiseas cinnteoireachta na Comhairle.

Le linn an chruinnithe sin, bheinn buíoch díot dá bhféadfá socrú a dhéanamh go ndéanfadh m’fhoireann iniúchadh ar ^{na doiciméid seo a leanas [3]:}

1. Comhaid a bhaineann le glacadh cúig ghníomh a glacadh tríd an nós imeachta i scríbhinn le linn ghéarchéim COVID-19. Ba cheart an dá ghníomh seo a leanas a bheith san áireamh sna cúig chomhad sin:

- Rialachán (AE) 2020/672 ón gComhairle an 19 Bealtaine 2020 maidir le bunú ionstraime Eorpaí le haghaidh tacaíocht shealadach chun rioscaí dífhostaíochta a mhaolú i gcás éigeandála (SURE) ag eascairt as ráig COVID-19 (cód idirinstitiúideach: 2020/0057)

- Rialachán (AE) 2020/696 ó Pharlaimint na hEorpa agus ón gComhairle an 25 Bealtaine 2020 lena leasaítear Rialachán (CE) Uimh. 1008/2008 maidir le rialacha comhchoiteanna le haghaidh oibriú aersheirbhísí sa Chomhphobal i bhfianaise phaindéim COVID-19 (cód idirinstitiúideach: 2020/0069)

D’fhéadfadh an Chomhairle na trí chomhad eile a roghnú agus d’fhéadfadh gníomhartha de chineál reachtach agus neamhreachtach a bhaineann le COVID-19 nó gníomhartha neamhghaolmhara a bheith iontu.

2. 6934 2020 INIT, dar teideal ‘Bearta eisceachtúla maidir le leanúint den chinnteoireacht sa Chomhairle’, an 19 Márta 2020.

3. Doiciméadacht atá ar fáil maidir le hoibriú trí mheitheal, lena n-áirítear cláir oibre, miontuairiscí cruinnithe, taifid ar chruinnithe neamhfhoirmiúla teileachomhdhálacha nó físchomhdhálacha agus torthaí na gcomhairliúchán i scríbhinn trí ríomhphost, sa tréimhse ama ón 1 Eanáir 2020 go dtí an 30 Meitheamh 2020.

D’fhéadfadh an Chomhairle na trí mheitheal a roghnú agus ba cheart meithleacha a bheith iontu a raibh (agus nach raibh) ‘cruinnithe riachtanacha’ acu.

Ní nochtfar faisnéis nó doiciméid a mheasann d’institiúid a bheith rúnda d’aon duine eile gan comhaontú roimh ré ón gComhairle. Scriosfar faisnéis agus doiciméid den chineál sin ó chomhaid an Ombudsman Eorpaigh go gairid tar éis dheireadh an fhiosrúcháin [4].

Chun forléargas iomlán a fháil ar an gcaoi a bhfuil an Chomhairle ag feidhmiú le linn na tréimhse sin, bheadh sé ina chuidiú freisin, le linn an chruinnithe cigireachta, na hábhair a leagtar amach thíos a fhiosrú. D’fhéadfadh sé gur mhian leis an gComhairle freisin freagra i scríbhinn a thabhairt ar chuid de na hábhair sin nó orthu go léir tar éis an chruinnithe:

1. Níl an nóta inmheánach a scaip an Ardrúnaíocht, ina leagtar amach feidhmiú phróiseas cinnteoireachta na Comhairle le linn ghéarchéim COVID-19, ar fáil go poiblí. Leag amach na cúiseanna atá leis an gcinneadh an nóta seo a choinneáil ‘inmheánach’.

2. I gcomhréir leis an gcinneadh ón gComhairle maolú go sealadach ar a Rialacha Nós Imeachta, níl aon chruinnithe foirmiúla de chuid na Comhairle á dtionól faoi láthair. Mar sin féin, is féidir leis na hairí teacht le chéile i gcruinnithe neamhfhoirmiúla aireachta a thionóltar trí fhíschomhdháil nó trí theileachomhdháil.

- An gcuirtear cláir oibre na gcruinnithe neamhfhoirmiúla sin ar fáil go poiblí? Má tá, cathain agus cén fhoirm?

- An féidir leis an bpobal rochtain a fháil ar thaifid na gcruinnithe neamhfhoirmiúla sin agus, má tá, conas?

3. Tuigim go leanann meithleacha na Comhairle, nach meastar a gcruinnithe a bheith riachtanach, de bheith ag obair gan cruinnithe fisiciúla a eagrú, áfach.

- An féidir leis an bpobal rochtain a fháil ar thaifid chruinnithe nó chomhairliúcháin na meithleacha nach de chineál fisiciúil iad? Mínigh le do thoil tríd an gcineál doiciméid a úsáidtear chun na gcríoch sin a leagan amach agus an mbeadh an pobal in ann taifid den sórt sin a aimsiú i gclár doiciméad na Comhairle.

- Tabhair forléargas ar a mhinice a tháinig meithleacha, gan cruinnithe fisiciúla, ar chomhaontú maidir le gníomhartha reachtacha idir an 23 Márta 2020 agus an 30 Meitheamh 2020?

Bheadh sé ina chuidiú dá bhféadfaí an cruinniú a eagrú sa dara leath de Mheán Fómhair 2020. Má bhíonn tuilleadh faisnéise nó soiléirithe ag teastáil ó d'fhoireann maidir leis an bhfiosrúchán, is féidir leo teagmháil a dhéanamh le m'Aonad um Fhiosrúcháin Straitéiseacha (Tanja Ehnert nó Elke Winter-Mes).

Le dea-mhéin,

Emily O'Reilly

[1] https://www.ombudsman.europa.eu/en/press-release/en/130298

[2] Sa bhreis ar fhiosrúcháin ar ghearáin shonracha, tá sé de chumhacht ag an Ombudsman Eorpach imscrúduithe a dhéanamh ar a tionscnamh féin. Fiosraítear i bhfiosrúcháin straitéiseacha saincheisteanna sistéamacha níos leithne a dhéanann difear do riarachán an Aontais:

[3] Déantar bailiú faisnéise agus cigireachtaí ar dhoiciméid ar bhonn Airteagal 3(2) de Reacht an Ombudsman Eorpaigh (http://www.ombudsman.europa.eu/en/resources/statute.faces#hl2) agus Airteagal 4 d’Fhorálacha Cur Chun Feidhme an Ombudsman Eorpaigh: http://www.ombudsman.europa.eu/en/resources/provisions.faces#hl3.

[4] I gcomhréir le hAirteagail 4.8 agus 9.4 d’Fhorálacha Cur Chun Feidhme an Ombudsman Eorpaigh: https://www.ombudsman.europa.eu/en/resources/provisions.faces