An 6 Samhain 2015, rinne tú gearán leis an Ombudsman Eorpach maidir le neamhroghnú do thairisceana faoin nós imeachta tairisceana PO/2015-02/SOF a sheol Ionadaíocht an Choimisiúin Eorpaigh sa Bhulgáir. Chuir tú isteach, go hachomair, an dá líomhain seo a leanas agus dhá mhaíomh:

Líomhaintí:

1) Theip ar Ionadaíocht an Choimisiúin Eorpaigh sa Bhulgáir freagra a thabhairt ar d'iarratas an 30 Deireadh Fómhair 2015 chun tuilleadh eolais a fháil ar an tairiscint bhuaiteach agus ar shoiléirithe ar mheasúnú do thairisceana.

2) Rinne Ionadaíocht an Choimisiúin Eorpaigh sa Bhulgáir, trína Choiste Meastóireachta, measúnú míchuí agus díréireach ar do thairiscint, agus bhí easpa trédhearcachta ann.

Éilimh:

1) Ba cheart d'Ionadaíocht an Choimisiúin Eorpaigh an fhaisnéis agus na soiléirithe a iarrtar a chur ar fáil.

2) Ba cheart athmheastóireacht a dhéanamh ar an scór a tugadh do do thairiscint.

1) Maidir le do chéad líomhain agus d’éileamh, de réir threoracha an Ombudsman, chuaigh mé i dteagmháil le seirbhís ábhartha an Choimisiúin. Mar fhreagra air sin, chuir an Coimisiún in iúl dom gur thug sé freagra ort an 23 Márta 2016 agus gur sheol sé freagraí níos luaithe chugat cheana féin an 9 agus an 16 Samhain 2015. Seoladh an dá fhreagra sin laistigh den sprioc-am 15 lá a leagtar síos in Airteagal 161(2) de Rialacha Cur i bhFeidhm an Rialacháin Airgeadais (RAP), eadhon an 9 agus an 16 Samhain 2015.

Ina dhiaidh sin, d’iarr mé ort barúlacha a chur isteach maidir leis an bhfreagra sin. Mar sin féin, ní bhfuair mé aon tuairimí uait. Dá bhrí sin, measann an tOmbudsman go bhfuil tú sásta leis an bhfreagra a fuair tú, agus go bhfuil bearta déanta ag an gCoimisiún chun an t-ábhar a réiteach.

2) Maidir leis an dara líomhain agus leis an dara maíomh a rinne tú, luaigh an Coimisiún ina fhreagra an 23 Márta 2016 gur chuir sé an Rialachán Airgeadais agus a RAP i bhfeidhm i gceart agus gur urramaíodh prionsabail an chomhionannais, an neamh-idirdhealaithe agus na trédhearcachta go hiomlán. Go sonrach, rinne an Coiste Meastóireachta comparáid idir na tairiscintí teicniúla agus ceanglais na sonraíochtaí tairisceana.

Maidir le Critéir 1 agus 2, luaigh an Coimisiún gur bhronn an Coiste Meastóireachta 28/30 pointe ort, arbh é sin an scór uasta a tugadh sa nós imeachta tairisceana. Mhínigh an Coimisiún nach bhfuil sé de cheangal ar chomhaltaí an Choiste Meastóireachta an scór uasta 30 pointe a shannadh d’aon tairiscint, agus go deimhin, gur léirigh an rangú deiridh go raibh 28 bpointe faighte ag tairiscintí a raibh barúlacha comhchosúla acu agus a bhí ag do chuid féin. Shonraigh an Coimisiún freisin gur dámhadh na pointí ar bhealach comhréireach agus gur caitheadh go cothrom agus go haonfhoirmeach le gach tairgeoir. Ar deireadh, mhínigh an Coimisiún gur mheas an Coiste Meastóireachta nach raibh do thagairt faoi Chritéar 1 don Tionscnamh Eorpach ó na Saoránaigh ábhartha toisc nach bhféadfadh sé measúnú a dhéanamh ar an gcaoi ar bhain an nós imeachta sin le feidhmiú Ionad Faisnéise an Aontais Eorpaigh sa Bhulgáir.

Maidir le Critéar 3, mhínigh an Coimisiún gur bhain an Coiste Meastóireachta úsáid as cur chuige pointí diúltacha i gcás freagraí doiléire, neamhiomlána nó neamhábhartha. I do chás féin, d’asbhain an Coiste Meastóireachta 5 phointe toisc nár chomhlíon do fhreagra ar Fhiosrúchán 3 na critéir go hiomlán, go háirithe ó thaobh soiléireachta de. Ba cheart gurbh é an freagra a bheadh ann comhairle a chur ar an duine ar dtús teagmháil a dhéanamh leis na húdaráis inniúla pinsin sula molfaí teagmháil a dhéanamh le SOLVIT.

Tháinig an Coimisiún ar an gconclúid gur dámhadh an conradh i gcomhréir leis na critéir roghnúcháin agus dhámhachtana a leagtar amach sna doiciméid tairisceana. Thug sé le fios, in ainneoin go raibh do thairiscint rangaithe chomh hard céanna leis an tairiscint bhuaiteach maidir le cáilíocht, nár thairg sé an praghas is ísle.

Thairis sin, tar éis measúnú cúramach a dhéanamh ar fhreagra an Choimisiúin an 23 Márta 2016, measann an tOmbudsman go ndearna an Coiste Meastóireachta measúnú ar do thairiscint i gcomhréir leis na rialacha ábhartha, lena n-áirítear rialacha infheidhme an Rialacháin Airgeadais agus a RAP. Is é conclúid an Ombudsman, dá bhrí sin, nach bhfuil údar le tuilleadh fiosrúchán maidir leis an dara líomhain agus éileamh a rinne tú. 

Dá bhrí sin, dhún an tOmbudsman an cás.

Lambros Papadias

Ceann Fiosrúcháin - Aonad 3

Strasbourg, 27/09/2016