D’iarr an gearánach ar Ghníomhaireacht an Aontais Eorpaigh i ndáil le Comhar i bhForfheidhmiú an Dlí (Europol) rochtain phoiblí a thabhairt ar mhalartuithe a bhí aici leis an gCoimisiún Eorpach maidir le togra le haghaidh rialachán chun mí-úsáid ghnéasach leanaí ar líne a chosc agus a chomhrac. D’iarr an gearánach rochtain freisin ar ríomhphoist a mhalartaigh Europol le heagraíocht a oibríonn chun mí-úsáid ghnéasach leanaí ar líne a chomhrac.

Shainaithin Europol roinnt doiciméad mar dhoiciméid a thagann faoi raon feidhme na hiarrata agus dheonaigh sé rochtain ar chodanna de na doiciméid sin. Agus rochtain ar an gcuid eile de na doiciméid agus ar chodanna de dhoiciméid á coinneáil siar aige, d’agair sé eisceachtaí faoi reachtaíocht an Aontais maidir le rochtain phoiblí ar dhoiciméid, agus d’áitigh sé go bhféadfadh nochtadh an bonn a bhaint de phríobháideachas daoine aonair, den tslándáil phoiblí, de phróiseas cinnteoireachta, agus de chosaint leasanna tráchtála.

Rinne an tOmbudsman iniúchadh ar na doiciméid agus bhí sí den tuairim go raibh deis ann tuilleadh nochta a dhéanamh. D’iarr sí ar Europol athmhachnamh a dhéanamh ar an seasamh a bhí aige roimhe sin agus an rochtain is leithne is féidir a dheonú. Mhol sí freisin, i gcás ina measann sé nach féidir rochtain a dheonú, go míneodh Europol ar bhealach níos fearr conas a bhainfeadh nochtadh an bonn de na leasanna atá á gcosaint.

Mar fhreagairt air sin, dheonaigh Europol rochtain phoiblí níos leithne ar chuid de na doiciméid a bhaineann lena mhalartuithe leis an gCoimisiún agus leis an eagraíocht. Chuir an tOmbudsman fáilte roimhe sin ach ba chúis aiféala di nár bhain Europol leas as an deis chun míniú níos fearr a thabhairt ar an bhfáth nach bhféadfaí rochtain iomlán a dheonú. Dhún sí an fiosrúchán inar thángthas ar an gconclúid gur ghlac Europol go páirteach lena togra réitigh.