Tá fiosrúchán féintionscnaimh oscailte ag an Ombudsman maidir leis an gcaoi a bhfuil sé beartaithe ag an gCoimisiún Eorpach urraim do chearta an duine a ráthú i gcomhthéacs Mheabhrán Tuisceana AE-na Túinéise (MT). Leanann an fiosrúchán ar aghaidh ó thionscnamh straitéiseach ar an tsaincheist chéanna.

Leag an tOmbudsman béim ar ábhair imní faoi easpa measúnaithe tionchair ar chearta an duine roimh ré, go háirithe maidir leis an gcolún 'Imirce agus soghluaisteacht' den MT agus na gníomhaíochtaí dá bhforáiltear faoin gcolún sin. D’iarr sí ar an gCoimisiún freagra a thabhairt ar shraith ceisteanna maidir leis an gcaoi a bhfuil sé beartaithe aige faireachán a dhéanamh ar an tionchar atá ag gníomhaíochtaí faoin MT ar chearta an duine agus maidir leis na bearta atá beartaithe aige, lena n-áirítear maidir leis an bhféidearthacht cistiú ón Aontas a chur ar fionraí, má shainaithnítear sáruithe ar chearta an duine.

Chinn an tOmbudsman gur ghlac an Coimisiún doiciméad ina leagtar amach conas measúnú a dhéanamh ar thionchar na dtionscadal faoin MT ar chearta an duine, agus thug sé isteach bearta chun faireachán a dhéanamh ar chomhlíonadh chearta an duine. Mar sin féin, níor chuir an Coimisiún an fhaisnéis sin ar fáil don phobal. Rinne an tOmbudsman moltaí maidir le feabhas a chur ar chúrsaí chun aghaidh a thabhairt air sin. Mhol an tOmbudsman freisin go ndéanfadh an Coimisiún critéir nithiúla a mhionsaothrú ina leagfaí amach conas a chuirfeadh sé conarthaí arna gcistiú ag an Aontas a bhaineann le bainistiú imirce ar fionraí i gcás ina n-aimsíonn sé fianaise ar sháruithe ar chearta an duine ag faighteoirí cistí (conraitheoirí). Sa chomhthéacs sin, mhol sí freisin go spreagfadh an Coimisiún a chomhpháirtithe cur chun feidhme faoin MT chun sásraí gearáin a chur ar bun inar féidir le daoine aonair sáruithe líomhnaithe ar a gcearta daonna a thuairisciú.