Tá an Coimisiún Eorpach freagrach as cinneadh a dhéanamh maidir le conas cistí a leithdháileadh faoin gCiste Eorpach Cosanta (EDF). Agus é sin á dhéanamh aige, tugann saineolaithe seachtracha cúnamh dó, a rannchuidíonn leis an meastóireacht, leis an athbhreithniú eitice, agus leis an measúnú ar mheastachán buiséid ar thograí. I bhfianaise leas suntasach an phobail sa réimse seo, d’oscail an tOmbudsman fiosrúchán féintionscnaimh maidir leis an gcaoi a gcinntíonn an Coimisiún nach bhfuil aon choinbhleachtaí leasa ann leis na saineolaithe a thugann cúnamh dó.

Chinn an tOmbudsman go mbraitheann an Coimisiún den chuid is mó ar an bhfaisnéis a chuir iarrthóirí isteach ina mheasúnú agus mhol sí dó faisnéis bhreise a lorg go réamhghníomhach a d’fhéadfadh coinbhleachtaí leasa a léiriú.

Léirigh an fiosrúchán freisin nach bhfuil aon athbhreithniú córasach á dhéanamh ar leasanna airgeadais na saineolaithe. Chun cuidiú leis sin a leigheas, mhol an tOmbudsman don Choimisiún iarraidh ar iarrthóirí dearbhú mionsonraithe leasanna a chomhlánú.

I gcásanna inar dhearbhaigh saineolaithe go bhféadfadh coinbhleachtaí leasa a bheith ann, chinn an tOmbudsman gur baineadh na saineolaithe sin as na tograí CEF lena mbaineann. Mar sin féin, shainaithin sí roinnt saincheisteanna maidir leis an gcaoi ar thaifead an Coimisiún a mheasúnú ar na coinbhleachtaí sin agus rinne sí moladh maidir le feabhas a chur orthu.