D’iarr an gearánach, eagraíocht neamhrialtasach, ar an gCoimisiún Eorpach rochtain phoiblí a thabhairt ar mheasúnuithe tionchair agus ar thuairimí an Bhoird um Ghrinnscrúdú Rialála maidir leis na hathbhreithnithe atá beartaithe ar rialacháin an Aontais maidir le substaintí ceimiceacha (‘REACH’) agus mearcair. Dhiúltaigh an Coimisiún ar dtús aon doiciméad a bhaineann leis an Rialachán maidir le Mearcair a nochtadh agus gan ach leaganacha atá folaithe go mór de na doiciméid a iarradh maidir le Rialachán REACH a nochtadh. Agus é sin á dhéanamh aige, d’agair an Coimisiún eisceachtaí faoi reachtaíocht an Aontais maidir le rochtain phoiblí ar dhoiciméid, agus d’áitigh sé go mbainfeadh nochtadh an bonn de chosaint leasanna tráchtála agus de phróiseas cinnteoireachta leanúnach.

Le linn fhiosrúchán an Ombudsman, dheonaigh an Coimisiún rochtain phoiblí iomlán ar na doiciméid a bhaineann leis an Rialachán maidir le Mearcair, toisc go raibh an próiseas cinnteoireachta tugtha chun críche, ach choinnigh sé a sheasamh maidir leis na doiciméid a bhaineann le Rialachán REACH.

Níor chuir argóintí an Choimisiúin ina luí ar an Ombudsman go mbainfeadh nochtadh an bonn go mór de na leasanna a chosnaítear leis na heisceachtaí a leagtar amach i reachtaíocht an Aontais maidir le rochtain phoiblí ar dhoiciméid. Thug sí dá haire gur dhiúltaigh Cúirteanna an Aontais arís agus arís eile d’argóintí comhchosúla agus d’athdhearbhaigh sí a tuairim go bhfuil sé ríthábhachtach go mbeadh rochtain phoiblí thráthúil ag saoránaigh ar dhoiciméid reachtacha, ionas gur féidir leo a gceart daonlathach a fheidhmiú chun tionchar a imirt ar reachtóireacht an Aontais.

Dá bhrí sin, bhí an tOmbudsman den tuairim gurbh ionann diúltú an Choimisiúin rochtain phoiblí iomlán a dheonú ar na doiciméid a iarradh agus drochriarachán. Mhol sí don Choimisiún athbhreithniú a dhéanamh ar a chinneadh agus rochtain phoiblí iomlán a thabhairt ar na doiciméid a iarradh. Dhiúltaigh an Coimisiún é sin a dhéanamh, mar sin dhún an tOmbudsman an fiosrúchán le cinneadh go raibh drochriarachán i gceist.