D’iarr an gearánach rochtain phoiblí ón gCoimisiún Eorpach ar theachtaireachtaí téacs agus ar dhoiciméid eile a bhaineann leis an bplé idir Uachtarán an Choimisiúin agus POF cuideachta cógaisíochta maidir le vacsaíní COVID 19 a cheannach. Mar fhreagra air sin, dúirt an Coimisiún nár shainaithin sé aon teachtaireacht téacs a thagann faoin iarraidh.

I gcomhthéacs fhiosrúchán an Ombudsman, tháinig sé chun solais nach measann an Coimisiún go dtagann teachtaireachtaí téacs go ginearálta faoina chritéir inmheánacha maidir le taifeadadh ina chlár doiciméad, mar gheall ar chineál ‘gearrshaolach’ a n-ábhair. Agus é ag déileáil leis an iarraidh, d’iarr an Coimisiún ar oifig phearsanta Uachtarán an Choimisiúin (cabinet) gan ach doiciméid a chomhlíonann a chritéir taifeadta a shainaithint. Dá réir sin, níor ceanglaíodh ar oifig phearsanta Uachtarán an Choimisiúin aon teachtaireachtaí téacs a shainaithint, agus dá bhrí sin ní dhearna an Coimisiún measúnú ar cheart teachtaireachtaí den sórt sin a nochtadh.

Bhí an tOmbudsman den tuairim gurbh ionann sin agus drochriarachán. Chun aghaidh a thabhairt air sin, mhol sí go n-iarrfadh an Coimisiún ar oifig phearsanta Uachtarán an Choimisiúin teachtaireachtaí téacs ábhartha a chuardach arís, agus chuir sí in iúl go soiléir nár cheart an cuardach a theorannú do dhoiciméid chláraithe nó do dhoiciméid a chomhlíonann a chritéir taifeadta. Má sainaithníodh aon teachtaireacht téacs ina dhiaidh sin, d’áitigh sí ar an gCoimisiún a mheas an bhféadfaí rochtain phoiblí a dheonú.

Mar fhreagra air sin, níor chuir an Coimisiún in iúl don Ombudsman ar fhéach sé arís ar theachtaireachtaí téacs nár taifeadadh ina chlár, agus níor thug sé aon chúis nár lorg sé teachtaireachtaí den sórt sin. I bhfianaise an mhéid sin, dheimhnigh an tOmbudsman a cinneadh go raibh drochriarachán i gceist.