Rinne an tOmbudsman tionscnamh maidir le trédhearcacht agus cuntasacht i gcur chun feidhme Shaoráid Téarnaimh agus Athléimneachta (RRF) an Aontais. Breathnaíodh sa tionscnamh ar an gcaoi ar chuir an Coimisiún Eorpach na sásraí trédhearcachta agus cuntasachta i bhfeidhm i gcomhthéacs RRF.

Dhún sí an tionscnamh ag fáiltiú roimh an dul chun cinn a rinneadh agus ag aithint roinnt réimsí le feabhsú, ionas gur féidir leis an bpobal a bheith níos eolaí faoin gcaoi a gcaitear na cistí seo. Áiríodh orthu sin trédhearcacht níos fearr do phleananna náisiúnta agus d’fhaighteoirí cistí sna Ballstáit, chomh maith le conas feabhas a chur ar an bhfaireachán ar thionchar na dtionscadal. Ós rud é gur dócha go bhfanfaidh leas an phobail maidir leis an tSaoráid Téarnaimh agus Athléimneachta ard sna blianta amach romhainn, tá sé beartaithe ag an Ombudsman leanúint d’fhaireachán a dhéanamh ar an gcaoi a n-áirithíonn an Coimisiún trédhearcacht na Saoráide Téarnaimh agus Athléimneachta agus a ndéanann sé maoirseacht uirthi.