D’iarr an gearánach ar Chomhairle an Aontais Eorpaigh rochtain phoiblí a fháil ar thuairim dhlíthiúil a bhaineann le comhaontú trádála an Aontais leis an Ríocht Aontaithe. Níor thug an Chomhairle rochtain ach ar chodanna den doiciméad. Agus í ag diúltú an doiciméad iomlán a nochtadh, d’agair an Chomhairle roinnt eisceachtaí faoi rialacha an Aontais maidir le rochtain phoiblí ar dhoiciméid, agus d’áitigh sí go mbainfeadh nochtadh iomlán an bonn de chosaint próisis cinnteoireachta leanúnaigh, caidrimh idirnáisiúnta agus comhairle dlí.

Rinne an tOmbudsman iniúchadh ar an tuairim dhlíthiúil atá i gceist agus bhí sí den tuairim gur agair an Chomhairle na heisceachtaí go mícheart faoi rialacha an Aontais maidir le rochtain phoiblí ar dhoiciméid. Dá bhrí sin, mhol sí mar réiteach go dtabharfadh an Chomhairle an rochtain is leithne is féidir ar an tuairim dhlíthiúil. Níor aontaigh an Chomhairle le moladh an Ombudsman maidir le réiteach.

Measann an tOmbudsman gurbh ionann diúltú na Comhairle rochtain leathan phoiblí a thabhairt ar an tuairim agus drochriarachán. Dá bhrí sin, rinne sí moladh a chomhfhreagraíonn don réiteach a mhol sí, eadhon, go ndeonódh an Chomhairle an rochtain is leithne is féidir ar an tuairim dhlíthiúil. Dhiúltaigh an Chomhairle do mholadh an Ombudsman. Dá bhrí sin, dhún an tOmbudsman an cás, ag deimhniú gur chinn sí go raibh drochriarachán i gceist.