Bhain an cás seo le hurraíocht chorparáideach Uachtaránacht Chomhairle an Aontais Eorpaigh. Mheas an gearánach gur cheart don Chomhairle urraíocht den sórt sin a rialáil nó a thoirmeasc. Dhiúltaigh an Chomhairle aghaidh a thabhairt ar an ábhar, agus d’áitigh sí gurb é rialtas an Bhallstáit a bhfuil an Uachtaránacht aige, agus é sin amháin, a bhí freagrach as urraíocht na hUachtaránachta.

Thug an tOmbudsman dá aire, ós rud é gur cuid den Chomhairle í an Uachtaránacht, gur dócha go mbraithfidh pobal na hEorpa i gcoitinne go bhfuil a cuid gníomhaíochtaí nasctha leis an gComhairle agus leis an AE ina iomláine. Dá réir sin, baineann rioscaí clú le húsáid urraíochta ag an Uachtaránacht agus ba cheart don Chomhairle aghaidh a thabhairt orthu. Dá bhrí sin, mhol an tOmbudsman gur cheart don Chomhairle, chun na rioscaí sin a mhaolú, treoir a chur ar fáil do na Ballstáit maidir le saincheist urraíochta na hUachtaránachta.

Ghlac an Chomhairle leis an moladh ón Ombudsman, agus d’fhógair sí go raibh sé ar intinn aici machnamh a dhéanamh ar threoir dea-chleachtais a eisiúint do na Ballstáit. D’fháiltigh an tOmbudsman roimh chinneadh na Comhairle agus dhún sé an fiosrúchán.