Fl-2001, tabib Ġermaniż ilmenta lill-Kummissjoni Ewropea dwar l-allegat nuqqas mill-Ġermanja li tikkonforma mal-leġislazzjoni ta' l-UE dwar il-ħin tax-xogħol, b'mod partikolari rigward il-ħin li t-tobba jkunu on-call fl-isptarijiet. Ir-regoli relevanti ġew stabbiliti fid-Direttiva 93/104/KE, u baqgħu fis-seħħ sakemm din ta' l-aħħar ġiet sostitwita bid-Direttiva 2003/88. F'żewġ sentenzi li ngħataw fl-2000 u fl-2003, il-Qorti Ewropea tal-Ġustizzja ddikjarat li l-ħin li wieħed jgħaddi on-call għandu jiġi kkunsidrat bħala ħin tax-xogħol fit-tifsira ta' dawn ir-regoli.

F'ilment li ġie ppreżentat lill-Ombudsman, f'Diċembru 2003 (ilment 2333/2003/GG), l-ilmentatur allega li l-Kummissjoni kienet naqset li titratta, f'perjodu ta' żmien xieraq, l-ilment dwar il-ksur tad-drittijiet tiegħu kontra l-Ġermanja. Wara li eżamina l-każ, l-Ombudsman ikkunsidra li l-allegazzjoni ta' l-ilmentatur kellha bażi tajba. Huwa nnota, iżda, li l-Ġermanja riċentement kienet introduċiet leġislazzjoni ġdida f'dan il-qasam, li l-Kummissjoni kienet għadha trid teżamina, u li l-Kummissjoni dehret li aċċettat li d-deċiżjonijiet tal-Qorti tal-Ġustizzja kienu ċċaraw il-kwistjonijiet legali relevanti. Fuq il-preżunzjoni li l-Kummissjoni ma kinitx ser iddum aktar sabiex titratta l-ilment dwar il-ksur tad-drittijiet ta' l-ilmentatur, l-Ombudsman, għalhekk, għalaq l-inkjesta tiegħu.

F'Novembru 2005, l-ilmentatur reġa' mar għand l-Ombudsman. Fl-ilment il-ġdid tiegħu, (3453/2005/GG), l-ilmentatur essenzjalment irrepeta l-allegazzjoni li kien diġà ssottometta fl-ilment preċedenti tiegħu, skond liema il-Kummissjoni kienet naqset li titratta, f'perjodu ta' żmien xieraq, l-ilment dwar il-ksur tad-drittijiet tiegħu. L-Ombudsman iddeċida li jiftaħ inkjesta ġdida.

Fl-opinjoni tagħha, il-Kummissjoni nnutat li f'Settembru 2004, kienet issottomettiet lil-leġislatur tal-Komunità, proposta għall-emenda tad-Direttiva 2003/88. Il-Kummissjoni ndikat li kienet ser teżamina l-ilment dwar ksur ta' l-ilmentatur fid-dawl ta' din il-proposta u tad-diskussjonijiet kontinwi ma' l-istituzzjonijiet l-oħra tal-Komunità.

L-Ombudsman ħa l-pożizzjoni li s-sottomissjoni ta' proposta għall-emenda ta' direttiva ma kinitx tippermetti li l-Kummissjoni tittraskura l-obbligi tagħha li tassigura li d-direttiva eżistenti tiġi rispettata mill-Istati Membri. Huwa kkunsidra wkoll li d-diskrezzjoni mingħajr dubju tal-Kummissjoni, fi kwistjonijiet relatati mal-ksur allegat minn Stati Membri tal-liġi tal-Komunità, ma kinitx tintitolaha li tipposponi b'mod indefinittiv li tilħaq konklużjoni dwar ilment fuq il-bażi li l-liġi applikabbli tista' tiġi emendata f'xi żmien fil-futur.

Fit-12 ta' Settembru 2006, l-Ombudsman, għalhekk, indirizza abbozz ta' rakkomandazzjoni li kien iħeġġeġ lill-Kummissjoni sabiex titratta l-ilment tal- ksur tad-drittijiet ta' l-ilmentatur b'mod diliġenti u malajr kemm jista' jkun.

Fl-opinjoni dettaljata tagħha, il-Kummissjoni żammet il-pożizzjoni tagħha.

Fl-10 ta' Settembru 2007, l-Ombudsman, għalhekk, issottometta rapport speċjali lill-Parlament dwar dan il-każ.