Ombudsman Ewropew

Sommarju tad-deċiżjoni dwar l-ilment 808/2011/MHZ kontra l-Kunsill Ewropew

Il-kwerelant, ċittadin Pollakk, intebaħ li waqt li kien fuq btala l-President tal-Kunsill Ewropew uża karozzi tas-servizz biex jivvjaġġa minn Brussell lejn ajruport Franċiż u lura, flimkien mal-familja. Talab lill-Kunsill Ewropew iwieġeb numru ta’ mistoqsijiet u kopja tar-regoli relevanti dwar l-użu ta’ karozzi tas-servizz għal skopijiet personali. Peress li t-tweġibiet tal-Kunsill Ewropew kellhom ton indifferenti u l-mistoqsijiet tal-kwerelant ġew sempliċiment injorati, huwa talab l-għajnuna tal-Ombudsman Ewropew.

L-opinjoni dwar l-ilment tressqet mis-Segretarjat Ġenerali tal-Kunsill tal-UE, li jassisti lill-Kunsill Ewropew. Is-Segretarjat Ġenerali hemeż kopja tat-tweġiba tal-Kunsill Ewropew għal mistoqsijiet parlamentari li kienu ferm simili għall-mistoqsijiet tal-kwerelant. F’din it-tweġiba, ġew proposti r-regoli relevanti.

L-Ombudsman sab li t-tweġibiet tal-Kunsill Ewropew lill-kwerelant ma kinux xierqa.  Ma setax jifhem għaliex il-Kunsill Ewropew ma tax lill-kwerelant l-istess tweġiba jew waħda simili bħal dik li ngħatat lill-MPE relevanti. Għaldaqstant għamel proposta ta’ soluzzjoni amikevoli li fiha ssuġġerixxa li l-Kunsill Ewropew jitlob apoloġija lill-kwerelant. Il-Kunsill Ewropew għamel dan. L-Ombudsman faħħar lill-Kunsill talli talab apoloġija lil ċittadin ‘ordinarju’ li rari kellu l-opportunità jidħol f’kuntatt mal-istituzzjonijiet Ewropej u li xorta waħda dar fuq il-Kunsill Ewropew biex isemma’ leħnu. L-Ombudsman ikkonkluda li din l-apoloġija sinċiera tikkostitwixxi l-aħjar eżempju tal-amministrazzjoni tal-UE li turi rispett lejn iċ-ċittadini. Ġibed l-attenzjoni fuq il-fatt li, mingħajr dan ir-rispett, id-distanza bejn l-UE u ċ-ċittadini tagħha ma tistax tonqos. Għalaq il-każ hekk kif ġie solvut mill-Kunsill Ewropew.