An tOmbudsman Eorpach
Cáipéisí gaolmhara
Achoimre ar chinneadh faoi ghearán 3106/2007/(TS)FOR i gcoinne na Gníomhaireachta Leigheasra Eorpaí
D’iarr an gearánach, a oibríonn i ndlíghnólacht na Gréige, ar an nGníomhaireacht Leigheasra Eorpach rochtain phoiblí a thabhairt dó ar dhoiciméid áirithe, eadhon, tuarascálacha um fhrithghníomh tromchúiseach díobhálach amhrasta i ndáil le Septrin, táirge cógaseolaíoch. Dhiúltaigh an Ghníomhaireacht dá iarratas rochtana. Bhunaigh sí a cinneadh ar an ngá le leasanna tráchtála a chosaint.
Tar éis iniúchadh a dhéanamh ar na hargóintí a chuir an gearánach agus an Ghníomhaireacht faoi bhráid, rinne an tOmbudsman dréachtmholadh chuig an nGníomhaireacht. Mheas sé go mbaineann rialacha an AE i ndáil le rochtain phoiblí ar dhoiciméid le doiciméid i seilbh na Gníomhaireachta freisin. Fuair sé nach raibh fianaise ann gur chuimsigh na tuarascálacha iarrtha aon fhaisnéis rúnda tráchtála nó aon fhaisnéis eile a dhéanfadh dochar d’aon leasanna dlisteanacha gnó tríú páirtí. Shonraigh sé, áfach, go ndearna an Ghníomhaireacht argóint nua a mhaígh go gcaithfí sonraí pearsanta (amhail sonraí pearsanta na n-othar agus na ndochtúirí tuairiscithe) cuimsithe sna doiciméid iarrtha a chur in eagar.
Ina freagra ar an dréachtmholadh, d’aithin an Ghníomhaireacht bunphrionsabail na hoscailteachta agus na trédhearcachta, agus d'aontaigh sí rochtain a thabhairt don ghearánach ar na sonraí iarrtha, tar éis di sonraí pearsanta a bhaint as.
Ghabh an gearánach buíochas leis an Ombudsman as ucht a chuid iarrachtaí cabhrú leis.
Agus an cás á dhúnadh aige, d’aithin an tOmbudsman an dul chun cinn tábhachtach atá déanta ag an nGníomhaireacht i ndáil lena cuid oibre a dhéanamh níos trédhearcaí. Anuas air sin, shonraigh sé go gcinnteoidh feabhsuithe suntasacha dá leithéid go mbeidh muinín níos mó ag saoránaigh sa Ghníomhaireacht, rud a mhéadódh a cuid dlisteanachta agus éifeachtachta i ndáil lena tascanna tábhachtacha a chur i gcrích.
