Ombudsman Eorpach

Achoimre ar chinneadh faoi ghearán 1329/2010/MF i gcoinne Pharlaimint na hEorpa

Ar 1 Bealtaine 2004, thug na Rialacháin Foirne d’Oifigigh an Aontais Eorpaigh ('Rialacháin Foirne') isteach struchtúr gairme nua agus scálaí tuarastail nua. I measc na bhforálacha eatramhacha bhí ”fachtóir iolrúcháin” ('FI') chun an céatadán den scála tuarastail nua a bhí le híoc le gach oifigeach a earcaíodh roimh 1 Bealtaine 2004 agus ar tugadh ardú céime dóibh tar éis an dáta sin a ríomh.

Líomhain an gearánach, oifigeach de chuid na Parlaiminte, gur úsáid an Pharlaimint modh ríofa dá thuarastal a bhí éagsúil ón modh úsáidte ag an gCoimisiún Eorpach agus ag gach institiúid AE eile.

Ina tuairim ar an ngearán, d’áitigh an Pharlaimint go raibh a modh ríofa cuí agus nach ndearna aon fhoráil dhlíthiúil ná cásdlí de chuid Cúirteanna an AE agóid dhlíthiúil ina choinne. Sa bhreis ar sin shonraigh sí, d’ainneoin a modha ríofa éagsúil, nach raibh ach miondifríochtaí idir tuarastail oifigigh na Parlaiminte agus tuarastail na n-oifigeach AE eile.

D’aontaigh an tOmbudsman nach raibh modh ríofa na Parlaiminte bunaithe ar léirmhíniú ba léir a bheith mícheart ar an bhforáil ábhartha. Léirigh sé, áfach, go dtugann prionsabal aontachta na Seirbhíse Sibhialta Eorpaí le tusicint gur cheart do gach institiúid na Rialacháin Foirne a léirmhíniú agus a chur i bhfeidhm ar bhealach comhsheasmhach. Bhí sé mí-ámharach mar sin nach raibh institiúidí an AE in ann cur chuige coiteann a chur i bhfeidhm i ndáil leis an modh a úsáideadh chun tuarastail na n-oifigeach a ríomh tar éis dóibh ardú céime a fháil, d'ainneoin comhlachtaí idirinstitiúideacha éagsúla a bheith ann, arna gcruthú agus é mar aidhm bheacht cur i bhfeidhm aonfhoirmeach na Rialachán Foirne a chinntiú. Thug sé faoi deara freisin go raibh difríochtaí i dtuarastail a bhí do-ghlactha agus, i gcomparáid le tuairim na Parlaiminte, nach bhféadfaí a mheas mar mhiondifríochtaí, mar thoradh ar mhodhanna ríofa éagsúla.

Dhún an tOmbudsman an cás le moladh gur chóir d'institiúidí an AE teacht ar chomhaontú maidir le modheolaíocht choiteann chun tuarastail bhunúsacha nua na n-oifigeach a ríomh tar éis dóibh ardú céime a fháil agus deireadh a chur leis an ionramháil dhifreálach a shainaithin an fiosrúchán reatha. Mhol an tOmbudsman freisin gur chóir d’institiúidí an AE meicníocht a chur i bhfeidhm roimh an chéad athbhreithniú eile ar na Rialacháin Foirne chun deacrachtaí léirmhínithe ar na forálacha athbhreithnithe a shainaithint agus seasamh coiteann a bhaint amach ag céim luath go leor chun éagsúlachtaí a sheachaint i gcleachtadh.