European Ombudsman

Achoimre ar chinneadh faoi ghearán 476/2010/ANA i gcoinne an Choimisiúin Eorpaigh

Chuir an Fhaireachlann Chorparáideach Eorpach, eagraíocht sochaí sibhialta, an gearán faoi bhráid agus baineann sé leis an gcaoi a láimhseáil an Coimisiún ceapachán in 2007, agus athcheapachán in 2008 agus 2009, de dhuine a d'fheidhmigh mar Chomhairleoir Speisialta neamhíoctha do Meglena Kuneva Uasal. Ag an tráth sin, ba í Kuneva Uasal an Coimisinéir um Shláinte agus Beartas Tomhaltóirí.

D’oscail an tOmbudsman fiosrúchán ar líomhaintí (i) gur theip ar an gCoimisiún cloí leis na rialacha nós imeachta a bhaineann le ceapadh Comhairleora Speisialta in 2007, 2008, agus 2009, agus (ii) gur theip air déileáil go leordhóthanach le saincheist maidir le coinbhleacht leasa féideartha idir tascanna an Chomhairleora Speisialta agus a chuid gníomhaíochtaí luacha saothair le cuideachtaí ilnáisiúnta cosúil le Microsoft, Michelin, agus Pfizer, agus fiontair stocaireachta cosúil le APCO.

Rinne an tOmbudsman trí ráiteas criticiúil ina chinneadh. Bhain sé de thátal as, maidir le láimhseáil nós imeachta an cheapacháin in 2007, gur theip ar an gCoimisiún dearbhú ar easpa coinbhleachta leasa a ghnóthú sular ainmníodh an Comhairleoir Speisialta. Maidir le 2009, theip ar an gCoimisiún Ráiteas Faoi Mhionn agus Dearbhú Gníomhaíochtaí a ghnóthú sular soláthraíodh Dearbhú Urrúis. Maidir leis an dara líomhain, chinn an tOmbudsman gur theip ar an gCoimisiún scrúdú leordhóthanach a dhéanamh ar shaincheist na coinbhleachta leasa féideartha agus é ag ceapadh an Chomhairleora Speisialta.

Sa bhreis ar sin, rinne an tOmbudsman dhá ráiteas breise leis an gCoimisiún. Ar an gcéad dul síos, bheadh dea-chleachtas riaracháin i gceist lena chinntiú go gcuireann an Coimisinéir freagrach Dearbhú Urrúis nua faoi bhráid nuair a dhéanann Comhairleoir Speisialta athrú suntasach ar a Dearbhú Gníomhaíochtaí aige/aici. Ar an dara dul síos, d’fhéadfadh an Coimisiún machnamh a dhéanamh ar Dhearbhú Gníomhaíochtaí de chuid Comhairleora Speisialta ionchasaigh a mhionathrú d’fhonn go leor faisnéise a fháil faoi ghníomhaíochtaí seachtracha an Chomhairleora Speisialta le cur ar a chumas aon choinbhleacht leasa féideartha idir tascanna an Chomhairleora Speisialta agus na gníomhaíochtaí seachtracha sin a scrúdú. Ina theannta sin, d’fhéadfadh an Coimisiún éileamh a dhéanamh ar an gComhairleoir Speisialta ionchasach a dheimhniú go bhfuil an Dearbhú comhlán agus, chomh fada agus is eol dó/di, nach bhfuil coinbhleacht leasa ar bith i gceist lena chuid/cuid feidhmeanna ionchasacha mar Chomhairleoir Speisialta.